الرجل ذو المرايا - 20
بنادم ديالنا مبنڭل أصاحبي. هانتا شوف هاذا دابا باغي يدور وجاي مزاحمني فالطريق. كدير مع هاذ البشر؟ شوف شوف شوف... ياولد القحبة باغي تموت؟ دين أمو قاطع الشانطي بلبيكلة ماشاف لاعلى ليمن لاعلى ليسر. تفو يصاحبي كيكفروك فالرب هاذ اولاد الكلب. كتكون شاد ساطليت كيقلبوليك الدماغ كتولي شاد لعجاجة. انت شادها فليبيا يردوك لميريكان. ولا يلوحوك لإسرائيل. واش عرفتي ديك إسرائيل؟ الزوجة الحنون دميريكان. كدير مابغات وميريكان كاطاكي عليها. هاذشي كامل ڭالوه لبارح فداك الفيلم التركي. أولا مسلسل... نسيت. عرفتيه؟ كايعاود القصة ديال ميريكان باش كانت محتلة إسرائيل وشي ستة ديال الدول أخرين. ستة أولا سبعة. شوف شوف هاذ البڭرة مدرمة كانت غادي اضرب دين امها الطوموبيل. راهي لكانت تقلبها. خطار دوك إسرائيل. هاهاها. ناري ناري كون يسمعوني شيديرولي... هاهاها. قلب قلب لهدرة. لبارح كنتفرج فالأخبار ڭاليك المغرب غيولي يصدر الكهربا لأروبا. أروبا كاملة الله أعلم غتولي مضوية على ظهورنا. ياولاد القحاب صلحو غاهاذ البولات، ست سنين هوما خاسرين كترو عا الشفارة بالليل. هاذ كحل الراس ماعجبكمش؟ مايستهلش؟ ضويو علينا الله يجازيكم بيخير. ڭاليك بلادنا بلاد الخير والكروش شبعانة. واش بقات فالكرش؟ لكرش اللي تاكل حولي تاكل خبزة وسيفيانة. الكرش لي دفعتيلها كتسرطو. خلاوها اللوالة. الله يرحم من قرا. أما حنا دياولنا مقابلين غا السريط.مالنا تاحنا متكون عنا فيلا فيها بيسين بحال البشر؟ نتفطحو شوية أخويا. لا. حنا مڭابلين غير الزرود والشعارات. التقدم ڭاليك. احتارمو غالمواعيد بعدة. كدير مع الواحد مع الجوج مثلا... وسيـــــر فوقاش يجيك. تعيطلو تڭولو فين انت يڭوليك هانا فالدورة. تسناه ساعة اخرى.
-خويا نحطك هنا؟
-غير هنا...
-الله يحفضك أزين والله العظيم ونستيني. فين غادا أشريفة؟ طلعي، طلعي دغيا.
هاذا ما تذكرته من كلام السائق. حكا كثيرا وبسرعة. اختلطت عليه الهموم وتشابكت أفكاره كزقاق المدينة التي يسوق فيها. أو ربما كانت رائحة البنزين والدخان التي يستنشقها كل يوم هي التي خربت عقله وأفقدته القدرة على التركيز. ربما. أو ربما الكحول. أو الكيف. أو هما معا. حمدت الله لأني وصلت الفندق بسلام.
0 commentaires:
Enregistrer un commentaire